Is-Sewwa.

Taħraq għajnejk xħin tħares lejha

statwa tal-ġebel issir

sakem tkun taf li int għarwien

u mhemm imkien fejn tmur tistaħba

fejn taħbi l-għera tiegħek

għax lanqas werqa m’għada tikber, kollox nixef.

Aħjar li tibqa rieqed

fis-sirda ta’ nofs il-lejl

mingħajr ma tħabbel rasek

għaliex għandek tkun taf

inkella x’għandek tfittex.

Aħjar tistaħba fl-isfumar

ta’bejn  wieħed u ieħor

ta’ meta tkun tistejqer

min-nagħas qadim miblugħ

u terġa’ ssir mill-ġdid tarbija ċkejkma.

Jibqa‘l- wens kbir li tħaddan dak li taf

li mingħalik hekk kien minn dejjem

mingħajr ma tikxref qatt fuq it-turretta.

Ikun aħjar, għax għandek mnejn

li titlaq tiġri.

Alfred Grech

01.08.2019

F’Daż-Żminijiet ta’ Ndulġenzi Plenarji.

F’daż-żminijiet ta’ ndulġenzi plenarji

fejn kulħadd jagħmel li jrid

u x-xejn mhu xejn,

imqar il-ħolm qed jgħejja

u l-ħsibijiet iltiema jitfaqqru

biex lanqas jibqa’ jwarrad fil ġonna tad-dnubiet

il-fjur tal-ilsna ħielsa

mirduma kif inhuma taħt id-dell tat-torrijiet.

U l-eternita’ wkoll ħalliet dawn il-gċejjer għeżież

li lanqas għadhom hemm.

Xħin titlaq minn qalb is-skiet

it-tluq jitwieled waħdu

il firda ma tkun xejn għajr il konferma

għax din tkun ilha f’moħħok u f’qalbek

għakemm żammejtha għalik,

u aħna m’aħna ħadd għajr barranin

li bqajna ngħixu qaqoċċa

ġol-bitħa ffullata tal-ħabs ta’ ruħna.

Alfred Grech

31.07.2019.

Biex Nisfidaw Lill-Allat t-Olimpu.

Il-ħsejjes ma jaqtgħux tal-makni mxajtna

li tellfulna l-ħemda u s-skiet tar-ruħ

ġew fuqna bħal barbari feroċi, għasafar tal-ħtif

li serqulna s-serħan tal-ispirtu.

Ġew u ħarbtu kollox għax hekk biss jafu jagħmlu.

u aħna l-ilsiera tas-sidien fewdali ’l-ġodda

Jilgħabu bl-godod tagħhom. il ġugarelli tal-adulti.

Il-ħsieb ta’ moħħna li dari

kien jistenbaħ ma tlugħ ix-xemx filgħodu tfixkel.

Iżda mqar fis-siegħa tad-dmugħ u tal-ħerba

ir-ruħ issib ix-xquq fil-fessuri tal-ħabs tagħħa

biex titniegħed u tieħu n-nifs.

Inqbadna f’dil-belliegħa ta’ min jistenna l-mewt

biex tiġi tieħdu.

Tlifna wkoll l-irfis fuq kordi ħielsa

u ħallejna l-binarji tar-ritmi melodjużi

u bqajna hawnhekk fuq din it-roqgħa art

dix-xtajta desolanti

bex nisfidaw lill-allat ta’olimpu.

Alfred Grech

30.07/2019

Caught In The Web of Life.

Caught in the web of life

you can dance me to oblivion

caught in the charm of your becoming

an illusion,

You can make me a new profet.

Like dewdrops the distillation

of emotions and you bgecome contagious

when you hold my hand

and make me write and in the end

I become a modern messaih.

Alfred Grech

29/07/2019

Issa Li Bdejna Ntennu l-aħħar Strofi.

Issa li bdejna ntennu l-aħħar strofi ta’ dina l-għanja tagħna

din l-għanja l’għannejniha kemm il-darba,

Din l-ghanja mqanżħa, din il-poeżija ta’ bla rima u ta’ bla ritmu

il-melodija mpromptu

ma nafux kif u fejn sejjra tispiċċa

jekk hux bil-koda. bl-allegrija, bil krexxendo maestuż

tnin tnin sakemm il-ħemda tiġi fuqna

inkella tieqaf sobtu

nintebħu li l-kolonni qed jiddajjfu

u t-tifkira ssir opaka u kull ma jmur tiċċajpar.

Għax hekk tispiċċa l-għanja tal-għanjiet

fuq korda stunata bit-temp x’aktarx jitqal u minn daqqiet jitħabbel.

Għax issa dħalna fid-dlam tas-sotterran,

u bqajna nkaxkru fil-penumbra

qabel ma sseħħ l-eklissi totali

u nistennew qiegħdin li għad iseħħ

dak li webbluna biħ sa minn ċkunitna.

Issa m’għadux iż-żmien li nħarsu ‘l-quddiem

u ngħoddu l-iskalluni ta’ sellum li jasal fl-infinit

ta’ sema trasparenti.

Issa ż-żmien ukoll waqaf

u l-pendlu tal-arloġġ qadim fil-pjan tat-taraġ

għejja.

Għax issa tlaqna l-kurrenti biex inħarsu ftit madwarna,

fejn ninsabu, u sibna

li m’aħna qiegħdin imkien.

Alfred Grech

29/07/2019.

IL-bieraħ Kien Hemm Inti.

Il-bieraħ kien hemm inti

ġiljuwa għada tiftaħ

fil-fwieħa mistħajjla

ta’ ġonna li jitbieħdu.

Il-bieraħ kien hemm inti

Għalkemm ma stajtx immissek

Għalkemm ma sajtx inkellmek

kont ħjiel ta xi qawsalla

li għad trid tidher

kont berqa fuq ix-xefaq.

Il bieraħ kien hemm inti

u ħsadtni ħabta u sabta

u tieqaf hemm il-ħarsa

fil qrif superfiċjali

fil bir ta’ xewqat ħielsa

fid-dawl ta’ kull tqanqila.

Illum iddardar l-ilma

u xejn ma għadu bħal qabel.

Illum tifhimni aktar.

Alfred Grech

28.07.2019

Dan Hu Waqt.

Dan hu waqt li xtaqt li jgħaddi,

Dan hu waqt li qatt ma kien,

Issa bdejt ngħodd kull minuta,

M’hemmx li nqassar ftit miż-żmien.

Xtaqt li qatt ma ġie dan fuqi,

Għax sibt ruħi gladjatur,

Dawra mejt fl-anfiteatru,

Saħħti tonqos kull ma jmur.

Dan destin li kiber miegħi,

Stajt naħarbu minn mil-bogħod,

Imma jekk il-barra noħroġ

Kif ser nerġa’ nsib is-sod?

Dan destin li fiħ sibt ruħi,

Ma fittixxs jien il-konflitt,

Din hi gwerra li rrid nagħmel,

Saram ġdid li qatt ma ridt.

Alfred Grech

27.07.2019

148.

Ikun dak li trid int mhux li rrid jiena

għax wiċċek maħsul baqa’ bl-aħħar dija

tal-għabex li ma kienx għax jien kont nieqes

bħal min baqgħalu ħafna triq xi jtrerraq.

Isibu l-fil li jgħaqqad naħħa m’oħra

jekk qatt ma ntbaħt li hemm xi differenza

bejn dak li seta’ ntqal u smajt b’widnejja

jew dak li stajt kont int inkella jiena.

F’dan l-ingranaġġ ta’ kapital u rejba

ma jibqa’ xejn xi jfakkrek fik innifsek

bħar-riħ li jonfoħ kiesaħ qalb ill-friegħi

ta’ dan il ħabs u jasar infernali.

Hawnhekk fejn tisma’ terġa qed iwerzaq

werżieq, li kienu jgħidu jsajjar l-għeneb.

Alfred Grech 

26/07/2019.

Ejja Ħdejja.

Ejja ħdejja sabiex tgħidli

Mnejn nitilqu u minn fejn bdiet

In-nixxiegħa ta’ kliem ħlejju,

Ħafna għarfien u ħsibijiet.

Ejja ħdejja sabiex tgħidli

l-poeżija kif imxiet,

Fuq ir-ritmi togħla u inżel

Sinfonija li rnexxiet.

Kavalkata tal-valkirji

Jew fis-skiet tal-ħin bla waqt

Għax tintebaħ xħin tistenbaħ

Kollu tiegħek dak li xtaqt.

Jew bħal friefet li jittajjru

Illi jdakkru l-frott u l-ward,

Xejn ma jibqa’ dak li jidher

Aktar kmieni milli tard.

Iva għanda l-poeija,

Għandha leħen sfiq, mexxej,

Jekk ma jkunx l-għannej li jgħanni

Kollox ħiemed jibqa’ għaddej.

Alfred Gech

25/07/2019