Min Jaf Hux Kollox.

Min jaf hux kollox attaparsi

Int kieku lanqas tgħidli

Għax inti attaparsi tħallini fl-għama,

l-għama tal-boloħ.

Int tgħidli li fl-ikbar u fl-iżgħar

Kollox jiċċajpar,

Ma jibqa’ xejn distint

U l-ebda xefaq ma jifred

Is-sema mill-baħar.

Sadanittant ix-xemx

Titla’ u tinżel kulljum

Minn wara x-xefaq

Siparju jieħor li jostor

Simulazzjoni.

U jiena qmara ieħor

Fl-orbita bla naf

Tal-qawwa ta’ sbuħiek.

Alfred Grech

31/07/2018

Li Kieku Fhimt.

Li kieku fhimt għaliex kont qed inwerżaq,

Ma kontx iddawwar wiċċek

U tagħmel ta’ bir-ruħek mintix tisma’,

Għaliex is-skiet tqil wisq

U tat-twerwir.

LI kieku fhimt il-freneżija li qabditni

Kont taf li dan hu diwi

Ta’ ħsejjes aktar fondi

Jirbumbjaw l-stunaturi nfantili.

LI kieku ħallejtni nterraq waħdi

Aktarx li ma kontx nasal f’tarf id-dinja,

Kont nibqa’ miexi wara dik il-kewkba

Ta’ mingħajr xuxa

U nispiċċa ninnamra magħhha.

Alfred Grech

30/07/2018

Kemm Qed Inħossni Xott.

Kemm qed inħossni xott,

din nixfa mhix sajfija

għalkemm l-imrewwħa ddur

iż-żiffa mhix għalija.

Kemm qed inħossni xott

kemm tista’ tkun bi tqila

trid terġa’ tiġi ż-żiffa

biex twelled xi tqanqila.

Kemm qed inħossni xott

bħal-għajn tal-ilma ġieri

li qatgħet, bħal kliem

li jidħol fil laħam ħaj u jfieri

Alfred Grech

29/07/2018

Jien Insejjaħlek.

Jien insejjaħlek

Iżd’inti ma tiġix,

Għax tibża’ li tinkixef

Fl-għera tiegħek.

Jien insejjaħlek

Iżd’inti ma tiġix,

Jien naf li hemm qiegħda

wara l-kantuniera,

Jien nibqa’ nistennik.

Alfred Grech

28/07/2018

Jekk Toqgħod Hawn.

Jekk toqgħod hawn ma titkellimx

jien nimla’ d-dinja tiegħi bis-skiet tiegħek,

u noqgħod jien ukoll nistenna bħalma l-lejl jistenna d-dellijiet

ma tlugħ ix-xemx filgħodu,

sakemm nistordi bl-aħħar hoss ta’ xi xi vettura

għaddejja ġġor quddiemha l-ħoss marsus

u warajha kuda twila.

Imbagħada għad filgħodu, xħin id-dellijiet jaħarbu

ejj’għanni l-għanja tal-għasafar fuq il-friegħi

qabel ma jaħarbu:

ejj’imla l-ġonna bil-ward tax-xemx

u bl-ilwien ta’ kull ward’oħra

qabel ma tinbena u timbela’

l-aħħar roqgħa rt.

Alfred Grech

27/07/2018

Kif Nagħmel?

Kif nagħmel ma nitlax

It-tarġa’ bħal ħaddieħor,

Jew nidħol fl-ingraġġ

Tal-wieħed jew tal-ieħor?

Kif nagħmel ma nweġibx,

Għal dak li jgħidu ’l-bqija

U ngħaddi bil-pulit

Bla jieħu ħadd għalija?

Kif nagħmel għidli ftit,

Għax għadda daż-żmien kollu.

Dir-rassa u dal-irbit

Ma nafx kif ser inħollu?

U nagħraf lili stess

Fil-baħħ u x-xejn taċ-ċaħda,

Nistaqsi kif għaddew

Il-granet, waħda, waħda.

Alfred Grech

27/07/2018

Godiva.

Hekk hu s-sabiħ tal-ħajja,

Joħorġu versi ħielsa,

Xħin tinżel sħaba sewda,

U tgħatti ħarstek mielsa.

Ja mara t’elf mitt ħolma

All’ ieħor jien noħloqlok,

Biex toħroġ minn ġol-ġaġġa

U timraħ kif jistħoqqlok.

U tirkeb fuq iż-żiemel

Tisfida bl-għera tiegħek

U tgħaddi minn ġot toroq

U ġġorr is-sewwa miegħek.

Noħloqlok ġenju akbar

Minn dak tal-abitudni

Tas-setgħa jew tal-qawwa

Twemmin jew konswetudni.

Noħorġok minn ġol-kwadru

Ta dinja mhux kif xtaqna

Il-barra mll-binarji,

Nistaqsu minn fejn tlaqna.

Alfred Grech

26/07/2018

Fuq Villa Rundle.

M’hemmx għalfejn nitbiegħed

Biex nislet versi ħielsa,

U m’hemmx għalfejn nitlajja noqgħod

Biex nisfida l-ħin għaddej,

Għaliex tqanqil ir-ruħ għandu minn tal-buffuri.

Għalih il-ħin mhuwiex se jgħaddi.

Ridt ninża għarwien u ridt nistaħba

Iżd’hawn kullħadd jarani.

Għandi l-vizzju li niġi hawn

F’dal ġnien tat-tifkiriet u tal-misteri

U ridt ninġarr mal-ilma ġieri

Tal-funtana.

Alfred Grech

24/07/2018

Tista'

Tista’ tħallini hawn bejn is-skiet ta’kull tbissima

jinħela fl-abbiss tal-ħarsa tiegħek.                       

Int li bħali tqum filgħodu

u bħalma jbus il ġawwi l mewġ tal baħar,

tfittex il-ħarsa tieghi.

Jiena nista’ nkun il-qlugħ tal bastiment

li jrid iwassal lili u lilek

fuq dik l-art fejn għadu ħadd ma rifes.

Din l-għanja tiegħi trid tiżżerzq

mal għola mewġ biex tista’ tasal

lilhinn minn fejn għsd tasal

tpetpit l-għajnejn jinvadi x-xefaq.

Kull meta naħrab mill-ħsejjes tas-solitudni

u niġi nfittex għandek, int turini

sema ogħla minn dak li nistgħu nilħqu.

Alfred Hrech

24/07/2018

Lanqas Biss.

Lanqas biss ma kont intbaħt

li fis-sema hemm kwiekeb seduċenti

li jegħmżu u jisparixxu

u xhin iridu jitfu d-dawl li jerġa’ jiddi.

Dik li ssejħilha mħabba

mhu xejn għajr il ħafna kliem,

tispiċċa d-diskursata

u duħħan ma kullimkien.

F’għajnejk fittixt il-ferħ

li ħaddieħor kien seraqlek

fuq xuftejk dik it-tbissima

illi taf is-skiet taċ-ċaħda.

Alfred Grech

23/07/2018

Salm

Dan salm li jintona r-riħ ivenven

ir-riħ li jtajjar it-trab li jgħammex l-għajnejn

bħal meta jitla’ l-għajru bla mistieden

u ma nibqax inħażżeż aktar dawk il-linji

safejn għad irrid nasal.

Imbagħad interraq għalxejn.

Meta tintebaħ bl-ilwien ikanġu

ta’ nżul ix-xemx li għal tant żmien tkun qiegħda tfittex,

issib li nkunu mxejna nofs it-triq,

u int predestinata li jien ma nilħqek qatt.

Imbagħad ġie swied il qalb

u żmien id-distrazzjoni

fis-soppa primordjali li t-tnejn li aħna twelidna fiha

li tagħġen dak li int u li qed tara.

Jien nibqa’ waħdi hawn sogħbien

biex inti tiġi żurni fil ħolm tiegħi u tgħidli

li bdejt tifhimni.

Alfred Grech

22/07/2018 

Fuq Ta’ Slima, San Lawrenz.

Bil paraxut tiddendel ix-xemx fi ħdan iċ-ċpar il minsi.

F’dawn l-inħawi fejn jgħammar is-skiet tal-fidwa

tghixhu bil jum kull jum li fih teżisti

u s-skiet jinkiser biss mit-tokki ta’ qanpiena

tintona l-għasar, jew it-tisfir tal-użinjol jistenna d-dalma.

Kif tista’qatt dir-ruħ ma tieħux nifs u toħroġ

minn ġol-fosdqa bħal bebbuxi wara ħalba xita

jekk fuq in-art qed tħossha hekk marsusa.

F’din in-nixfa ta’ Lulju li jixwi fuq il-gradi

tkun biss il-fewġa tal-grigal li tiffriska

ir-ruħ tissielet mal-ħsieb lebbiet li qatt ma jċedi.

F’daw’ l mergħat ta’ ħaxix niexef u ħuxlief li jeħel maż-żarbuna

tista’ tinsa, u tħalli wara spallejk ix-xewqa li trid tinftiehem

imqar  ma xi gremxula inkella xaħmet l-art lli tmur tistaħba

hekk kif joqorbu l-ħsejjes.

Il-bniedem biss b’ħidmietu jikser is-seħer ta’ dil mixja

tal-infinit li ma jidħolx fin-nisġa ta’ dak li s-soltu jiġri.

U meta tasal f’tarf l-irdum trid tieqaf hemm

għaliex bħal tibża li l-abbiss li jiġi taħthu jista’ jaħtfek.

Moghħdija sserrep qalb l-għelieqi tista’ twasslek

għax f’daqqa waħda bħal donnok taqta’ qalbek.

Ir-resħa tal-grigal hi biżżejjed biex traqqad is-sensi

u ħin bla waqt intbaħt bil ħtieġa tal-għajnuna.

Jien niġi hawn infittex il-ħsibijiet ta’ qalb ir-raba

qabel l-għajn li qatt ma taqta’ ħesrem tinxef.

Dal-blat ma jġibli ebda nostalġija

għaliex ma fiħx is-sensazzjoni ta’ meta kont ngħix

mingħajr ma naħseb u meta tibda tiela’ t-telgħa

ssib li t-toqol qed jiżdied imqar jekk hemm min jgħinek.

Hawnhekk il-poeżija tiġeu l-ħajja.

Alfred Grech

21/07/2018

LXII.

Saturnu jiġi jżurni għall-għarrieda,

U f’daqqa waħda jinżel is-siparju,

U tgħaddi mingħalija l-mewt qerrieda

U nibda tiegħla t-telgħa tal-kalvarju.

Imbagħad tibdew tarawni qed nitbiegħed,

U nħaffer sew fil-baħħ ta’ ġewwa fija,

Nistaqsi lili nnifsi jien fejn qiegħed,

Għax f’sikti jien ma nkunx, tieħdux għalija.

Saturnu jiġi u jagħmel kollox tiegħu,

Iħabbat b’saħħtu l-bieb, biex jidħol ġewwa,

U jekk niqaflu, jġorrni b’kollox miegħu

U jiferx saltna skura ta’ bla ħlewwa.

Fil-baħħ u f’qiegħ l-uġiħ ta’ ruħ għajjiena

Jonfoħ ir-riħ u jdawwar ir-raddiena.

Alfred Grech

30/09/2012

Ma Rridx Nisma’.

Ma rridx nisma’ kantalieni

Ma rridx nisma’ aħbarijiet,

Fuq l-iskrin jew diġitali,

Kull filgħodu f’dan-naħħiet.

Ma rridx nidħol fil-binarji,

Bħalma jagħmlu ta’ kuljum

Dawk li huma egħref minni

Minn dan kollu rrid insum.

Jew inkejjel is-sħab fl-arja,

Għax ninsab mal-migdudin,

Sibt jien ruħi bl nistaqsi,

Ġo did-dinja tal-bnedmin.

Ġo did-dinja tal-virtwali,

Ġo did-dinja tax-xbiehat,

Toqgħod tisma’ x’qiegħdin jgħidu,

Minn dak kollu x’jimpurtak?

Nidħol nerġa’ f’dan iċ-ċirku,

Bla ma biss jikkonsultawk,

Ikaxkruni, jimbuttawni,

Bla ma biss jikkunsidrawk.

Noqgħod biss irrid għalija,

Waħdi, waħdi ġo xi għar,

Jew inkella f’xi bettija

Jew inkella wara ċ-ċpar.

Alfred Grech

20/07/2018

U Kollox Rega’ Għal Li iien.

Jien stajt kont dawk l-affarijiet li kont qed noħlom

u stajt ma kont qatt xejn minn dan,

Int stajt kont dawk il-ħwejjeġ kollha

u għalhekk l-aħjar li ma ltqajniex.

Int issa tlaqt issib lilek innifsek:

minn dawk l-nħawi kont għaddejt.

Jien naf li għad trid terġa’ lura

imbagħad noqgħodu hawn it-tnejn

u ngħixu dak li jista’ jkun jew sata’ kien.

Jien ħsibt li nista’ nagħmel l-isbaħ ħaġa li naf nagħmel:

Ngħanni;

Għalik kien telf ta’ żmien.

Jien ħsibt li nista’ nagħmel

l-inqas ħaġa, noqgħod nisma’

Il-widna tiegħi ma tridiex.

Jekk ridt tambur biex toqgħod fuqu ttambar

iż-żifna ma bdilthiex,

kien ħamar il-lejl u issa sebaħ,

u kollox rega’ għal li kien.

Alfred Grech

19/07/2018

LXI

Int bħal rigal li ġejt imkekkeb sewwa,

Li sbiħ din l-għodwa ħadni għall-għarrieda,

Mingħajr ma ftaħt il-bieb ġa dħaltli ġewwa,

Flixkun bl-aħbar, fix-xibka tas-sajjieda.

Kebbist musbieħ il-lejl fid-dlam ta’ dari,

Wellidt xi ħaġa ġdida li kont nafha,

Li qatt ma ħlomnt li kienet hawn madwari,

Nixxiegħa t’ilma ħaj li jġib l-indafa.

Għalxejn għarrixt biex naqta’ minn fejn ġejja,

Biex issa l-għadda ż-żmien jaġħtik li tifhem,

Minn fejn għaddejt sakemm wasalt sa ħdejja,

Biddiltni ta’ taħt fuq, fir-ruħ u l-ġisem.

In-nisġa’ ta-destin u t-twettieq tiegħu,

Hu dawl fuq il-warrani li jġorr miegħu.

Alfred Grech

13/09/2013

Kemm Se Ddum?

Kemm se ddum ma tiftaħ is-separju

tgħolli d-dublett u tibda’ tisfen

il-Paso doble?

Jien lanqas m’għadni nemmen

fir-rakkont tiegħek biex nistejqer

jew trid toqgħod hawnhekk

biex tilgħab mistoħbija,

ferħa ta’ waħda li taqra l-qsim il-qalb

fuq wiċċ il-baħar ħiemed.

Kemm sejjra ddum ma tiftaħ il-persjana

inkella tfittex il-qassis

biex titlob maħfra?

Tgħid il-biża’ kien biss tal-fatati jew l-uħux

li jisfumaw fi sbieħ il-jum?

Għaliex hemm barra l-kotra

lanqas biss ma tarf x’qed jiġri.

U kemm se ddum tilgħaba din il-logħoba

il-logħoba tat-tlellix u tal-irtokki?

Tgħodd biss lil min idawwar wiċċu

biex iħares u jneħħi l-maskra.

Il-ħarsa tiegħek iva tinfed

u issa li ġejt tfittixni

għandek bżonn min ifissirlek

għaliex ninħtieġ id-dwejjaq

biex nibda’ nifhem.

Alfred Grech

16.07.2018

Xi Minn Daqqiet.

Xi minn daqqiet jien nagħmilha ta’ kavallier

U niġi nfittxek lilhinn miċ-ċittadella,

Iżda l-mantell tiegħi ma jaħbix

dan l-univers ta’ dellijiet li dritt jaħarbu

kull meta nibda naqdef kontra kull rima.

Id-dehera tiegħek daħlet f’moħħi

bħal meta tiftaħ ktieb għall-ewwel darba

u tħares lejn il-qoxra biex mingħalik trid taqta’

x’għandu xi jgħidlek.

Xħin bdejna nimxu lejn xulxin intbaħna

li kien għad jonbqos pass ieħor

u bejnek u bejni kien hemm dejjem

il-baħħ tal-infinit

u l-bogħod li hemm bejnietna

mhuwiex lanqas bogħod wieħed.

Jien nibqa’ naqdef xorta waħda

mar-rima li tħallili l-fwieħa tiegħek

inkella s-skiet ta’ xi sirena

minflok ninħeba fiha nnifsi.

Alfred Grech

14/07/2018

F’Dawk il Jiem.

F’dawk il jiem t’għanjiet qosra

għax it-tgħarixa tmur u tiġi. . .

F’dawk il-jiem meta kont nisma’

l-leħen tiegħek qalb is-skiet u l-ħsejjes tal-kampanja

kont nilmaħ it-tbissima fuq xufftejk

iddawwal kull ħaġa mdallma

imqar dak kollu li żammejna mistur bejnietna

inkella dak kollu li għamilt jien waħdi

meta inti ma kontx qed tħares.

F’dawk il-jiem kont inxomm il-fwieħa tiegħek

kull meta r-riħ kien ifakkarni

li sar il-ħin

u jiena ħsibt li se narak

titfaċċa minn x’imkien.

F’dawk il-jiem jien kont ferħan

għax kelli lilek.

Alfred Grech

13.07.2018

Xħin Jaqa’ s-Skiet Bejnietna.

Xħin jaqa’ s-skiet bejnietna

int titlaq ’l-hemm

u tħalli rima tfugħ ta’ xewqat sbieħ

biex jerġa’ jgħaddi ż-żmien

u jien jibieli.

Xħin jerġa’ jaqa’ s-skiet bejnietna

jien bħal nistrieħ

u nħoss li tar minn fuqi

it-toqol ta’ destin li ma flaħtux

U tkun marrittli kull mistħija

tal-attur li qatt ma rreċ’ta.

Xħin jaqa’ s-skiet bejnietna

inkun waqajt fil-muta tal-poeti

u int ma jkun baqagħalek xejn

xi tgħidli aktar

għaliex il-kliem ikun tilef

is-seħer tiegħu.

Xħin jaqa’ s-skiet bejnietna

jkun għaliex inti tkun sirt

tad-demm u l-laħam.

Alfred Grech

12.07.2018

Ma Rridx Dal-Ħafna Skedi.

Ma rridx dal ħafna skedi,

ninqabad f’kontra temp,

għax sa ma jasal għada

għad jaqbad il-maltemp.

Jien issa qed bi kwieti

ta’ dan se nħallas żgur

bil-qares u bid-doppju

kull kif għax hekk imur.

Għax min bi kwietu joqgħod

did-dinja ma tħalliħx,

bis-saram u bid-dnewwa

ħlief swat din ma tagħtiħx.

Alfred Grevh

11.07.2018

Li Kieku M’Hawnx inti.

Li kieku m’hawnx int tgħidli x’għandi nagħmel

kieku jien norqod,

u nagħmel bħal qattusa li tgħaddi l-ġranet tagħha

rieqda.

Fid-dlam jagħtini ħmar il-lejl

u nibda nara

inkella niggranfa bħalma jagħmel farfett il-lejl

ma saqaf rasi l-isfel

biex nirrifletti ta’ taħt fuq

jekk dak li nara jiġri jagħmilx sens

inkella assurd;

jekk posti hux ma dawn in-nies

inkella x’imkien ieħor

fejn jibda jgħadd iż-żmien

bil-maqlub.

Alfred Grech

10/07/2018

Imnaqqxa Hemm It-tifkiriet.

Imnaqqxa hemm it-tifkiriet tad-dehera tiegħek

sibilla t’elf mitt skuża u t’elf mitt qamar.

Int ma rajtnix fil-kwadru li pinġejt,

Il-kwadru kien għal-mostra ta’ ħaddieħor

Ridt biss magħluq iżżommni fil-kaxxetta

tal-bżonnijiet jew ta’ xewqatek.

Int ridtni konfessur biex tqerr dnubietek,

jew xalpa ddur mal-għonq f’lejla xitwija.

Jien ridt li nibdni pont biex fuqu nimxi

u tgħaddi l-ferrovija ta’ ħajjitna.

09/07/2018