X’Nagħmlu Meta Joqrob Il-Milied.

X’nagħmlu meta joqrob il-Milied?

Meta qlubna jkunu mtaqqla bid-dwejjaq

U bit-toqol tal-imgħoddi?

Xħin nilmaħ lilek ngħid bejni u bejn ruħi

Int tiswa’ daqs il-poeżija

Li nsejt li kelli nikteb

Bħat trab li jtir mar-riħ

Ir-riefnu li jġorr il-weraq

Id-degħxa

Il-ħsibijiet li jirkbu dahar il-friefet

Bħaż-żnażen li jerdgħu il-ward

U mbagħad nistaqsi lili nnifsi

Dak li ridt ngħid

Mil-liema lewn minn tal-qawsalla

Tnissel?

Jonqosni sħaba kien nitla’ fuqha

U nħossni mġedded bħal qaddisin

Biex lanqas nemmen dak li ħadd ma ġarrab

U li għal ħajti kollha ttamajt fih

Jew nirkeb bastiment spazjali

U hekk lanqas int ma bqajt tarani.

Alfred Grech

04/12/2019