Meta T-Tifkiriet.   .

Meta t-tifkriet isiru bħat-tvenvin

tar-riħ li jgħaddi bejn il-fili tal-luċelettrika

imperrċa mal-arbli fit-toroq ta’ nħawi minsija

inkella bħal karozzi mrażżna mill-freni

jwerżqu l-gomom tar-roti jgħaqqdu mal-asfalt

fit-tfittxija frenetika li tirbaħ iż-żmien

jien nibda naħseb biex nerġa’ lura għal għandek

għaliex fi  ħdanek hemm ir-risq u l-hena.

Imbagħad jiġri li nħossu t-tnejn li aħna

il-ħlewwa tirfina bħal ambrosia fuq ilsienna

biex nibdew nissugraw fuq meded ġodda

f’dawk l-inħawi fejn ħadd għadu ma resaq

inkella li minnhom għad ħadd qatt ma reġa’ lura

għaliex ma nistabrux li jista’ jkun hemm xefaq

li tiħqu ma tistax

jew li lilhinn minnu

issalpa ma tistax.

Jien imbagħad insir l-għannej

li nikteb ħafna versi b’nifsi maqtugħ

għax naf li l-pinna ma tlaħħaqx mal-ġiri tal-ħsieb

u quddiem għajnejja ma jifdallix għajr l-era ta’ ġismek

ħierġa bil-mod il-mod

mill-ilma ta’ xatt il-baħar

li qatt ma żort.

Alfred Grech

16.11.2019.