Fissazzjoni.

Ma nafx kif iffissajt li tridni nħobbok,

Jekk int mintix ħlief dehera efimerali,

Aspett li ta’ kuljum tarah jinbidel

U kull xħin nersaq lejk jiċċajpar kollox.

Ma nafx kif tridni ngħid li hu għal dejjem,

Jekk taf bit-terrimoti tal-burdati

Li jbiddlu wiċċ id-dinja kull filgħodu

U inti bħali minn mument għall-ieħor.

Għax trid ukoll issib ir-ruħ tewmija

U taf li l-varjeta’ daqshekk hi kbira,

U tgħid li għal kull biċċa hemm seħbitha

U taf li l-għażla hija dejjem tqila.

Għax jien insib is-seħ fil-baħħ ta’waħdi,

Tvenvin ir-riħ fis-skiet tas-solitudni

Għalilja l-unita’ fix-xejn ta’ dejjem,

U serħ fis-skiet il-bogħod mill-multitudni.

Alfred Grech

15/09/2016