Int Trid Li Tisseduċi r-Riħ.

Int trid li tisseduċi r-riħ

U nterġa’ tiġi f’ħoġri.

Inkella toqgħod tifqa’ l-bżieżaq

Imdendla bl-arja

Bħal bews li ma jidhirx

Tnehid fid-dlam tal-lejl

Merfugħ fuq nifs il-karba.

Imbagħad malajr jinfaqgħu f’wiċċna

Kull ħolma tal-kartun

Qabel naqsmu għan-naħħa l-oħra

Tal-ġejjieni mhux magħruf

Magħdud ma dak li ġara.

Bħal-ħolm li ħlomna ta’ tfal żgħar

Inċerti u trasparenti,

Bħal-bżieżaq tas-sapun

Intiru ferħanin fl-ispazju.

Alfred Grech

29/09/2017