Kemm Se Ddum?

Kemm se ddum, tiela’ u nieżel

Ittenni  ta’ kulljum

Dak li ġonġejt il-bieraħ

U x-xogħol qatt mhu mitmum.

Mid-dar trid tmur l-uffiċċju

U mill-uffiċċju għad-dar

U dejjem ħajja waħda

U ddumx għax il-ħin sar.

Bilfors hekk qalbek taqta’

U tgħid dan hu għalxejn,

Li l-ħajja bla tifsira

U tkompli tgħix għalfejn?

Trid tkun biss ossessjoni,

Jew ta’ min ma jaħsibx,

Ikompli f’dir-rutina

U b’dan la tistagħġibx.

Hemm biss il-ħsieb tal-għada

Min jaf ikunx bħal-lum,

U lill-allat t’olimpu

Tisfida ta’ kulljum.

Hemm biss li tibqa’ konxju

Mhu xejn dan ħlief duħħan,

Għax kollox irid jgħaddi

U xejn ma sar bil-għan.

Hemm biss li tuża moħħok

U fis issir ribell,

Taż-żmien u ċ-ċirkostanzi

U żieda fuq munġbell.

Alfred Grech

25/07/2020