Fuq Ix-Xurbebb.*

Hawnhekk il-barka t’Alla,

Il-qawwa tal-ħolqien,

Il-fwieħa li tinfirex

U timla kullimkien.

U tista’ tibqa’ sejjer

Mal-blat ta’ kull kulur,

Max-xifer ta’ rdum għoli,

U tista’ tibqa’ ddur.

Hawnhekk spettaklu ieħor

Jinbidel ta’ kuljum,

Il-ħoss qalil tal-baħar

Fis-skiet bin-nifs miżmum.

Hawnhekk ir-ruħ tittajjar

Il-bogħod mill-ħafna ġenn

Ta’ nies ma tafx x’ser tagħmel,

Hawnhekk hawn ftit tal-kenn.

Hawnhekk sar kollu tiegħi,

Safejn trid twassal l-għajn,

Passaġġi ġol-għelieqi

Li jsallbu mal-oħrajn.

Hawnhekk ħadd mhu se jlumek

U tista’ tgħid li trid,

Xi serp minn taħt xi blata

Jiskappa bħal għafrid.

Hawhekk il-beraħ jifrex,

Hawn kollox qed għal kwiet,

Hawn m’hawnx minn jista’ jaħtaf

U jitfa’ biss fil-bwiet.

U lanqas min ipatti

Għalxen, jew għax kattiv,

Il-ħsejjes infernali,

Bl-istorbju awdjoviżiv.

Hawnhekk id-dinja tieqaf

Hawnhekk jirrenja s-sliem,

Hawnhekk m’hawnx min qed jirfes,

Hawn kalma kullimkien.

Hawn biss iż-żiffa tmelles,

Ir-riħa tal-busbies,

Il-paċi tan-natura,

Hawnhekk il-bogħod min-nies.

Hawnhekk jien nerġa’ niġi

Għax jiena ma rrid xejn

Ħlief noqgħod ftit bi kwieti,

Għax ngħaġġel m’hemmx għalfejn.

Alfed Grech.

25/07/2016

* Ix-Xurbebb huwa pajżaġġ sabiħ li jagħmel parti minn Kercem, raħal twelidi.