Irridek.

Irridek taħraqni sew

Bin-nar tal-esuberanza tiegħek

Fuq il-gradilja tal-ħeġġa li tħeġġeġ

Il-benniena ta’ mwejġiet li qanqalt fija

U tismotni biż-żejt jaħraq

Tal-balzmu fuq il-ġamar ta’ tmellis idejk

U l-ħlewwiet kliemek.

Irrid nintilef f’dak il-paradoss

Ta’ għamad ħieles ta’ ħdanek trasfigurat

Li jittrasmetti kull sensazzjoni

Li tiżboq ħolm il-bniedem.

Imbagħad irridek taqbadli jdejja

U tniżżilni fis-saltna tal-abbissi

Fis-saltna ta’ Hades

Biex jien nifdik mill-ġdid

Bl-għana ħieles ta’ Orfew.

Alfred Grech

10/01/2019