LXIII.

Ir-ruħ trid ħaddan hi lid-dinja tagħha

Fil-ħemda twieżen dak li għal ħaddieħor,

La jista’ u lanqas jiflaħ, hi ġġor magħha,

Tbati, u ma tgħarafx min waqt għall-ieħor.

Ir-ruħ trid tfittex hi l-għeliem minn tagħha,

Kolonna ta’ duħħan f’deżert il-ħajja,

Jew tiġi minn x’imkien, jekk għad tismagħha,

-          Fis ħalli minn idjek, u ejja wrajja-.

U jekk qalb dat-tfixkil hemm it-tweġiba,

Ma tiġi qatt għaliex imkien m’hemm wiri,

Qalb dal-pajżaġġ imħarbat trid issibha

Biex hekk għad jasal darba tmiem il-ġiri.

Imbagħad tistaqssinix kif sibtni qribek,

Inkella ’l-min staqsejt sabiex insibek.

Alfred Grech

15/10/2012