Ħadd ma Jimla’ l-Ħolm li Joħlom.

Ħadd ma jimla’ l-ħolm li joħlom

Ħadd ma jersaq, jiġi ħdejk,

U jekk titlob, xejn ma taqla’

U ma ġġorr xejn ġewwa jdejk.

Ħadd ma jwieġeb xħin issejjaħ

Lil min tħobb ma jroddlok xejn,

Tikteb ktieb u ħadd ma jaqra’

U dal ġiri, dan, għalfejn?

U quddiem l-allat t’olimpu

Għalxejn tinżel għarkubtejk,

Sakemm għad issib xi mara

Li taqragħlek taf idejk.

Dan l-infern ta’ din id-dinja,

Għax xħin titlob ma taqlax,

Mingħalik li tista’ timraħ,

Iżda taħrab ma tistax.

Alfred Grech

11/11/2016