Sakemm Naqbad ir-Ritmi.

Sakemm naqbad ir-ritmi tal-mewġ

Tiegħek, ma nafx liema triq

Jew liema sqaq jew vijadott

Ser iwassalni għal-għandek

Ja sibilla t’elf leħen u ton

Ittenni s-sewwa tal-allat

Jirbombja l-għerien ta’ ruħi.

Sakemm naqbad il-kurrenti tiegħek

Ma nafx liema wegħeda, liema talba

Jistgħu tassew iressquni lejk

U jqassru did-distanza ta’ bejnietna.

Iżda fuq kull tarġa li twassal

sal mitbaħ hemm ġrajja

ta’ mħabba u qtigħ il-qalb

li tista’ tfakkrek fija.

Alfred Grech

07/02/2020