Biża.

Nibża’ nkellmek bl-ilsien li bih nitkellem

Għax nibża’ wisq li int ma tifhimnix

U nibża’ nkellemek ċar u tond bħal bqija

Għax  tibda’ int ukoll ma taħmilnix.

Għalhekk inkellmek b’dan it-ton u ċ-ċiera

Li  jista’ għalik wkoll ma jagħmilx sens

Jekk tifhem ftit jew tifhem ħafna għalija

Festa,  għax  kull ma xtaqt kien ftit tal-wens.

Għax f’daqqa waħda fhimt li xejn ma jiġri

U kollox jerġa’ joqgħod għal li kien

Għax hekk jew hekk teatru dan m’hemmx x’tagħmel

U inti issir tassew jekk irrid jien.

Int tista’ bħali tkun tad-demm u l-laħam

U tista’ tkun ukoll bħad-dellijiet

Għax ħloqtok jien, biex nista’ hekk nitbiegħed

Minni nnifsi kull meta nkun għal-kwiet.

Alfred Grech

14/09/2019