Ersaq ’l-Hawn.

Ersaq ’l-hawn u għannaqni ftit

Infettani bil-mard tiegħek

Il-meħla ssuq lilha nfisha

Kulħadd bil-maskar f’wiċċu

Għaddej żbrixx minn ħdej nis-skiet

Hekk kif tikser il-kantuniera.

Ilpup feroċi l-werrieta

Jaħtfu u jferrxu dak li ġemgħet

In-nemla. L-Avultuni jirgħu

Fuq il-priża ta’ ħaddieħor

U jħajjru ’l-min għandu

biex ibieġħ ħwejjġu u jibqa’ jgħix

Fuq sħaba diġitali.

Hawn bċieċen li jitilgħu huma wkoll

Fuq il-passarella sabiex jidhru

Bħal ħaddieħor u

Viva Malta Tagħna

Din l-art mimlija ħalib u għasel

Dil- bużżieqa ekonomika

Imdendla mal-ħajta li niżġet

Il-brimba. Hekk il-ġejjieni

Fuq dil-blata solitarja

Li ma tittieħed minn ebda mudell

Tal-friefet il-lejl isoffu u jerdgħu

Demm ħaddieħor.

Tistaqsinix kif sibna ruħna

Fid-dlam ta din il-mina

Ibku lilekom u lil uliedkom.

Alfred Grech

06/04/2020.