Idillu Ta’ Pandemija.

Kien hemm bżonn tal-pandemija

Kien hemm bżonn ma jibqa’ ħadd

Mingħalih li hu xi seqer

Kollox jaħtaf u ’l-kullħadd.

Kien hemm bżonn li waqfu r-roti

Biex minn qiegħed jara kbir

Min għalih ma hemmx konfini

Ruħu jsib malajr ġol-bir.

Sabiex dawk li ħatfu u ħarbu

Jispiċċawlhom il-ksuħat

Dawk li ntefħu u kibru żżejjed,

Kollox frugħa tal-frugħat.

Kien hemm bżonn li kollox jieqaf

U x’aktarx dan hu l-mument

Ta’ ċaqlieqa biex jitheżżeż

Saħansitra l-pedament.

Kien hemm bżonn ta’ xi rewwixta

Jew iweġġgħu ħafna nies

Iżd’aħjar dil-pandemmija

Biex kulħadd jiqsar bil-qies.

U hekk il-kbir maż-żgħir jintlaqat

Ħadd ma jgħid li hu r-rebbieħ

Hekk kullħadd ikun intaġar

Ħadd ma joħroġ qawwi u sħiħ.

Alfred Grech

10/04/2020.