Bużżieqa.

Issa li ntbaħna li l-għana efimerali

Kapital diġitali li qiegħed biss fis-sħab

Tal-konġetturi komputerizzati

U fin-numri favolużi,

Issa ġejna daħarna mal-ħajt

U mank baqgħalna għaxja ta’ lejla.

Issa li nafu li din mhix triqtna

U wasalna f’tarf l-isqaq

U issa għandna ħajt iħares fiss f’għajnejna

X’ser nagħmlu?

Aħna xorta bqajna ossessjonati bħal ħmir bil-kappestru

Mixjin wara l-impusturi

Li jwassluna biss sa tarf l-irdum.

Issa li ġejna fi kliem il-profeti sielma

Li għollew leħinhom fost l-għajjat ta’ min iħaġġar

Li baqgħu ma nstemgħux

Bqajna m’għamilna xejn

Għax għaddejnihom bħal imġienen

Li kien għalina tfajnihom

Ġewwa manikomju

Inkella llikwidajnihom.

Issa se noħroġu ndoqqu bit-trumbetti

Tar-razziżmu u l-estremiżmu

Bħallikieku dan kollu ma kienma jidher  sa mill-bidu

Ħalli jibqa’ jiggalleġġja fuq il-mewġ

Tal-opportunita’ min lanqas u msejjaħ

Biex imexxi l-merħla.

Alfred Grech.

A18.03.2020.